Osasun Departamentuak 20 urteko iraupena izango duen IMPaCT Kohorte proiektu nazionala aurkeztu du gaur Lezkairuko osasun zentroan
 

Fernando Dominguez Osasun kontseilariak IMPaCT Kohorte ikerketa aurkeztu du gaur Lezkairuko osasun-zentroan. Azterlan horren helburua da datozen 20 urteetan Espainiako biztanleak ordezkatzen dituzten 200.000 pertsonaren (4.000 Nafarroan) osasunari buruzko azterketa sakona egitea, gaixotasun nagusien jatorria hobeto ulertzeko, eta, horrela, gaixotasun horiek prebenitzen eta tratatzen laguntzeko, medikuntza pertsonalizatua eta doitasunezkoa sustatuz. Patricia Palacio eta Óscar Lecea ikerlari nagusiak eta Nafarroako ikerketaren kolaboratzaileak eta Susana Miranda Lehen Mailako Arretako gerenteak ere parte hartu dute ekitaldian.

Carlos III.a Osasun Institutuak sustatu du ekimena, Sareko Ikerketa Biomedikoaren Zentroak (CIBER) koordinatua, eta autonomia-erkidego eta hiri autonomo guztietako 21 erakundek eta oinarrizko arretako zerbitzuek parte hartzen dute. Foru Komunitatean, kohorte IMPaCT Navarrabiomed – Fundación Miguel Servet ikerketa biomedikoko zentrotik kudeatzen da, eta, bestalde, Osasunbideko Lehen Mailako Arretak Lezkairuko osasun zentroarekin koordinatzen eta gauzatzen du azterlana, proiektuaren nodo gisa.

4 osasun-zentrotako 4.000 pertsonaren lagin ausazkoa

Datozen bost urteetan, Nafarroan bizi diren 16 eta 79 urte bitarteko 4.000 pertsona sartuko dira azterketan, lau osasun-zentrotakoak: Lezkairu, Bigarren Zabalgunea, Milagrosa eta Aranguren Ibarra. Espainiako biztanleriaren ordezkaritza leiala bermatzeko, parte-hartzaileak ausaz aukeratzen dira; horregatik, pertsona batek ezin du bere burua boluntario aurkeztu kohorte IMPaCTn parte hartzeko.

Parte hartzen hasten direnean, bost urtean behin, azterketa fisiko oso bat egingo zaie Lezkairuko osasun-zentroan, osasun-galdetegi zehatz bati erantzungo diote eta lagin biologikoak hartuko zaizkie. Gainera, jarraipeneko kontaktu ohikoenak egingo dira telefonoz edo aplikazio mugikorren bidez. Informazio hori guztia Osasunbideko datu-base klinikoetan edo estatistikoetan eskuragarri dagoenarekin osatuko da.

Osasuneko kontseilariak azpimarratu duenez, "herritarren lankidetza funtsezkoa da. Lezkairutik kontaktatutako pertsonek proiektuaren potentziala ulertuko dutelakoan gaude, herritar guztien osasuna hobetuko duena eta deitzen badiote parte hartuko duena ".

Oraingoz, ikerketak Nafarroako ausazko lagina osatzen duten 4.000 pertsonetatik hamar bildu ditu. Osasunbideak hautatutako pertsonek testu-mezu bat jasoko dute, Lezkairuko osasun-zentrotik harremanetan jarriko direla adieraziz, eta azterketan parte hartzera gonbidatuko dituzte, baita proiektuaren informazio-webgunerako esteka bat ere, xehetasun guztiak aurkitzeko. Mezuaren hartzailea "Salud Comunicaciones" izango da, eta testu hau izango du, bai gaztelaniaz, bai euskaraz:

• [Nombre +iniciales apellidos]: Estamos realizando un estudio sobre salud de la población navarra Cohorte IMPaCT. Te llamaremos del Centro de Salud de Lezkairu para invitarte a participar. + información:  portalsalud.navarra.es/es/cohorte
   
• [Izena + hasierako abizenak]: Nafarroako biztanleriaren osasunari buruzko azterlan bat egiten ari gara IMPaCT Kohortea. Lezkairuko Osasun Zentroak parte hartzera gonbidatzeko deituko dizu. Informazio +:  portalsalud.navarra.es/eu/kohortea
   

Ikerketaren garrantzia

Patricia Palacio eta Óscar Lecea Osasunbideko Lehen Mailako Arretako medikuak ikerketaren buru dira Nafarroan, eta ikerketaren garrantzia azpimarratu dute: "kohorte IMPaCTk mugarri bat ezarriko du Espainian ikerketa biomedikoa egiteko moduan. Lortuko diren datuei esker, komunitate zientifikoak hobeto jakingo du nola prebenitu gaixotasun nagusiak eta adinarekin, lesioekin eta desgaitasunarekin lotutako narriadura ".

Banakako eta populazioko datuen, datu klinikoen, genetikoen, epidemiologikoen eta bizi-ohituren erregistro dinamikoa izateko aukerak aukera emango du gaixotasun-eredu prediktiboak eraikitzeko, osasun-arloko desberdintasunak identifikatzeko, funtsezko adierazleak monitorizatzeko eta osasun-politiken inpaktua ebaluatzeko.

Adibide arrakastatsuak daude beste herrialde batzuetan, hala nola Erresuma Batuan, Frantzian, Alemanian, Suedian edo AEBn. Kohorte horiek lagin biologikoak eta informazio epidemiologiko oso zabala dute – faktore sozialak eta ekonomikoak barne –, eta prebentzioan eta arreta pertsonalizatuan aurrera egiteko oinarrizko tresna dira. Horrela, IMPaCT kohorteak Espainiako doitasun-medikuntzari buruzko ikerketan jauzi kualitatiboa ematea ahalbidetuko du, gure herrialdea maila berean kokatuz.