•    Navarrabiomed – Miguel Servet Fundazioak garapen berritzaile honetan lagundu du transferentzia teknologikoa erraztuz.

Berrikuntza eta Teknologiaren Europako Institutuak, osasun-berrikuntzako programaren (EIT Health) bidez, DIABYUDA merkaturatzea finantzatuko du. Nafarroako Ospitale Unibertsitarioko Endokrinologia Zerbitzuaren berrikuntza teknologikoa da, eta Navarrabiomed – Miguel Servet Fundazioak kudeatzen du. Garapenak 2 motako diabetesa duten pazienteak artatzen laguntzeko plataforma digital bat eskaintzen die profesional sanitarioei, ebidentzian oinarritutako tratamendu-plan pertsonalizatuen bidez, beste espezialitate batzuekin lankidetzan.

Ekimenaren buru Joaquín de Carlos Artajo dago, Endokrinologia Zerbitzuko medikua eta Navarrabiomed - MSFko mikroINTENTSIFIKAZIOEN (mINT) Programaren onuraduna. Hark gidatuko du lantaldea, Berrikuntzako Zerbitzu Zientifiko Teknikoarekin eta ikerketa biomedikoko zentroko Kudeaketa Unitatearekin batera. Lantaldeak Nafarroako Unibertsitateko Inkubagailuaren eta Nafarroako Unibertsitate Klinikaren laguntza ere badu. 
Proiektua “Deep Tech Venture Builder 2025” deialdiaren barruan dago eta 85.714 euroko laguntza ekonomikoa du, % 70ean kofinantzatutako zenbatekoa. 
 
Doitasunezko medikuntza baterako AA

Diabetesaren Nazioarteko Federazioaren arabera, 2 motako diabetesak 9 helduetatik bati eragiten dio, eta pazienteen % 45ek baino gehiagok kontrol eskasa dute, tratamendua izan arren.

Gaixotasun kroniko hori komorbilitateekin lotzen da askotan, hala nola gaixotasun kardiobaskularrekin, giltzurrunetakoekin, hipertentsioarekin eta dislipidemiarekin (odoleko gantz-mailen alterazioa). Horren ondorioz, gero eta konplexuagoa da erabilera klinikoa, eta baliabideen erabilera intentsiboa eskatzen du. 

Testuinguru horretan, DIABYUDA erabaki klinikoak hartzen laguntzeko sistema digital bat eskaintzeko sortu zen, arreta pertsonalizatuagoa eta ebidentzian oinarritua emango duen doitasunezko medikuntza bat bultzatzeko diseinatua. Zehazki, hainbat espezialitatetako gida klinikoetan oinarritutako diziplina anitzeko ezagutza medikoa integratzen du plataformak, adimen artifizialarekin eta informazio klinikoarekin, erabaki farmakologikoak hartzea babesteko, eta paziente bakoitzarentzat plan dietetiko eta jarduera fisiko pertsonalizatuak eskaintzen ditu. 
“Espero den eragina hirukoitza da: profesionalen erabaki klinikoak hobetzea, kontrol metabolikoa hobetzea, pazienteentzako konplikazioak murriztea eta osasun-sistemen karga arintzea, eraginkorragoak eta iraunkorragoak izan daitezen”, dio Joaquín de Carlosek. 
 
Transferentzia teknologikoa 

EITk esparru akademikoan soluzio teknologiko aurreratuak proposatzen dituzten enpresa emergenteei beharrezko laguntza ekonomikoa eta prestakuntzakoa eskaintzen die, oztopo ohikoenak gainditzeko eta “Heriotzaren Harana” izenez ezagutzen den fase batean merkaturatzeko, epe ertain eta luzerako bideragarritasun finantzarioa bermatuz.

Osasun-arloko 2025. deialdian, 17 ekimen babestu dira, horietako 4 espainiarrak, osasun-berrikuntzaren bidez Europako herritarren bizi-kalitatea hobetzea helburu dutenak. Programak aholkularitza emango die lantaldeei arlo hauetan: araudia, estrategia, finantzaketa eta berrikuntzaren babesa, transferentzia teknologiko hori bermatzeko.
 

Ezkerretik eskuinera: Mikel Rubio (NB), Ander Ernaga, María José Goñi, Emma Anda eta Joaquín de Carlos (NOU), Javier Robledo (NU) eta Javier Escalada (NUK). Irudian ez daudenak: Beatriz Pérez eta Marina Galilea (NB).