Lara Matilla Cuencak, Navarrabiomedeko Kardiologia Translazionaleko Unitateko doktoretza aurreko ikertzaileak, Nafarroako Unibertsitate Publikotik egindako doktore tesia irakurriko du datorren astelehenean, urriaren 30an, 11:30etan, Navarrabiomedeko Ekitaldi Aretoan.

Doktore lana, ‘Sex differences in aortic stenosis. A role for the aldosterone/mineralocorticoid receptor axis and its biotarget Galectin-3’, izenekoa, Navarrabiomeden eta Nafarroako Unibertsitate Ospitalean egin da, Natalia López Andrés Kardiologia Translazionaleko Unitateko ikertzaile nagusiaren zuzendaritzapean. 

Ikerketaren garapena eta emaitzak
 

Aorta-estenosi larria mendebaldeko balbulopatia ohikoena da, eta gero eta prebalentzia handiagoa du biztanleriaren zahartze progresiboagatik. Gaur egun, tratamendu posible bakarra aortako balbula-ordezpena da. Eraginkorra izan arren arrisku eta kostu handiekin lotuta dago. Medikuntza pertsonalizatuagoa bilatze aldera, aortako estenosian dauden sexu-desberdintasunak ikertzea da lan honen ardatza.

Doktorego-tesi honen eskuizkribua 4 artikulu zientifikok osatzen dute. Artikulu horietan, balbulen ordezko kirurgia egin zitzaien 200 paziente baino gehiagoren 3 kohorte erabili ziren. Kirurgietan lortutako balbula-ehuna abordatze histologiko, molekular eta zelularra egiteko erabili zen.

Ikuspegi traslazionaletik planteatuta, lan honen helburua gaixotasunaren mekanismo fisiopatologiko nagusiak aztertzea da (hantura, estres oxidatiboa, fibrosia, matrizearen birmoldaketa, kaltzifikazioa, apoptosia eta angiogenesia), bai balbula aortikoetan, bai horietatik eratorritako balbula-zelula interstizialetan. Gainera, Aldosterona bideak/hartzaile mineralokortikoideak eta bere dianak (Galectina-3) gaixotasunean izan dezaketen papera ikertu zen, baita bien inhibitzaile espezifikoen erabilera onuragarria ere, balizko diana terapeutiko berriak deskribatzeko.
 

Finantzaketa eta emaitzen hedapena

Tesi hau Carlos III.a Osasun Institutuaren finantzaketarekin eta pFIS doktoretza aurreko kontratuen programarekin garatu ahal izan da. Gainera, Larak nazioarteko bi egonaldi egin ditu 2022an eta 2023an Frederic Jaisser irakaslearen laborategian, Parisko Centre de Reserche des Cordeliers zentroan, Nafarroako Unibertsitate Publikoaren bidaia-beka bati esker lehenengoan, eta Carlos III.a Osasun Institutuaren (M-AES) beste bat bigarrenean.

Doktorego-tesia garatu bitartean, Lara Matillak 17 artikulu zientifiko argitaratu ditu, eta horietatik 8 lehen edo lehenengo egile gisa. Gainera, Larak emaitzak zabaldu ditu nazioko eta nazioarteko zenbait puntutan, horietako bitan ahozko saioan: European Section of the Aldosterone Council (ESAC) Erroman 2019an eta Artery Congress, Nancy, 2022an.