• Navarrabiomedeko Haur eta Gazteen Jarduera Fisikoaren Ikerketa Unitateak garatu du

Navarrabiomedeko Haur eta Gazteen Jarduera Fisikoaren Ikerketa Unitateak Nafarroako Ospitale Unibertsitarioarekin (NOU) eta ANADI lankidetzan sustatutako eta IdiSNAren bidez kudeatutako Diactive-1 proiektuak ITEMAS-ISCIII Kalitate Zigilua lortu du, osasun digitalean soluzio berritzaile gisa duen kalitate zientifiko-teknikoa, heldutasun maila eta transferentziarako potentziala bermatzen dituen aitorpena.

Diactive-1 ikerketa-ildo sendo eta finkatu baten emaitza da, Carlos III.a Osasun Institutuak finantzatutako proiektuen (PI21/01238) bidez garatua. Proiektu horien helburua 1 motako diabetesa duten haur eta nerabeen artean ariketa fisikoaren praktika seguruagoa, pertsonalizatuagoa eta eraginkorragoa sustatzea izan da.

Proiektua ariketa fisikoa modu seguruan eta erabiltzaile bakoitzaren beharretara egokituta egitea ahalbidetzen duen aplikazio batean gauzatu da. Tresnak indar-entrenamenduko programa pertsonalizatuak, heziketa terapeutikoko edukiak eta ariketa fisikoan zehar gluzemia-egonkortasuna mantentzeko gomendioak eskaintzen ditu. Helburua da ariketa fisikoa gaixotasunaren kudeaketan integratzea erraztea eta 1 motako diabetesa duten haur eta nerabeen osasuna eta bizi-kalitatea hobetzen laguntzea.


Transferentzia-potentzialaren aitortza

Ebaluazio-txostenaren arabera, Diactive-1ek premia kliniko garrantzitsu bati erantzuten dio eta aplikazio-potentzial handia du Osasun Sistema Nazionalean. Era berean, balorazio positiboa jaso dute lortutako garapen-mailak eta etorkizuneko balidazio- eta ezarpen-faseetara aurrera egiteko duen gaitasunak.
Azpimarratutako alderdien artean dago gaur egun 11 ospitaletan (PI24/00829) martxan egotea; horrek ingurune kliniko errealetan ebidentzia sortzea eta etorkizunean arreta sanitarioaren praktikan txertatzea errazten du.
“ITEMAS-ISCIII Kalitate Zigilua jasotzea oso babes garrantzitsua da Diactive-1entzat; izan ere, proiektuaren kalitate zientifiko eta teknologikoa ez ezik, haren transferentzia-potentziala eta praktika klinikoan izan dezakeen eragina ere aitortzen ditu”, adierazi du Antonio García-Hermosok, proiektuaren ikertzaile nagusiak eta NUPeko irakasle titularrak.


Teknologiaren balorizazioa bultzatuz

Aitortza hau lortzea posible izan da ikerketa-taldearen eta Navarrabiomedeko Berrikuntzako Zerbitzu Zientifiko-Teknikoaren arteko lankidetzari esker. Zerbitzu horrek proiektuaren heltze-prozesuan eta transferentzia-estrategiaren definizioan lagundu du. Prozesu horren barruan, Diactive-1ek bere marka erregistratu du (019322598 zk.), 1 motako diabetes pediatrikoaren (8-18 urte) arloan irtenbide digital berritzaile gisa duen identitatea eta posizionamendua indartuz.
“Aitortza honek agerian uzten du ikerketa-proiektuetan transferentzia hasierako faseetatik lantzearen garrantzia. Diactive-1en kasuan, laguntza-prozesu bati esker haren balio-proposamena sendotu da, babes-estrategia definitu da eta ITEMAS-ISCIII Kalitate Zigilua lortzeko hautagaitza lehiakor bat prestatu da”, azaldu du Beatriz Pérezek, Navarrabiomedeko Berrikuntzako Zerbitzu Zientifiko-Teknikoaren arduradunak.


Eragina sortzeko bokazioa duen ikerketa

Zigilu honekin, Diactive-1ek bere posizionamendua indartzen du benetako premia kliniko bati erantzuteko garatutako eta osasun-sisteman txertatzeko potentziala duen irtenbide digital gisa. Proiektuak ebidentzia zientifikoa, ezagutza klinikoa eta teknologia uztartzen ditu, 1 motako diabetesa duten haur eta nerabeen artean ariketa fisikoaren praktika seguruagoa eta pertsonalizatuagoa sustatzeko.
“Hau beste urrats bat da 1 motako diabetesa duten gazteak pixka bat libreago senti daitezen”, adierazi dute Ignacio Hormazabal eta Jacinto Muñozek, proiektuko ikertzaileek.
ITEMAS-ISCIII Kalitate Zigilua jasotzeak, gainera, Diactive-1 sistema sanitarioan aplikatzeko potentziala duten ekimen berritzaileen estatuko sare batean txertatzen du. Navarrabiomed ITEMASen parte da erakunde elkartu gisa. ITEMAS Carlos III.a Osasun Institutuaren (ISCIII) plataforma bat da, osasun-berrikuntza eta teknologia-transferentzia sustatzen dituena ehun ospitale, institutu eta ikerketa-zentro baino gehiagok osatutako sare baten bidez. Lankidetza horrek pazienteen eta profesionalen benetako beharrei erantzutera bideratutako berrikuntzen garapena, balidazioa eta adopzioa errazten ditu, eta Diactive-1 bezalako proiektuak osasun-sisteman aplikazio praktikorantz aurrera egitea ahalbidetzen du.